台閩用詞台灣閩南語的文讀音、白話音的辨別(網路下載版)

台灣閩南語師資研習教材 臺灣閩南語 語音結構及其練習 台灣閩南語的文讀音、白話音的辨別 夢生(Dyertung) email:dyertung@yahoo.com.tw 時間：2002.07.29 台灣閩南語的文讀音、白話音的辨別 目 錄 1台灣閩南語的文讀音、白話音的辨別 1前言 1扮仙 4現象 4文讀音和白話音形成的背景 6透濫 7分辨白話音和文讀音 7白話音 7文讀音 8白話音舉例 8俚語和諺語 8農諺 8歌謠 9民謠 10民歌 12情歌 12流行歌 13相褒歌 13童謠 15跮跎歌 15教化歌 16孽畜仔話 16謎猜 17來講文讀音 17漢字特色 18文讀音的來源 18傳統韻書 19附提羅馬拼音 19換講假名拼音 20語音特色 20文讀音和韻書的關係 21三十字祖 21和普通話閩南語詞典做比較 22及彙音寶鑑比較 23彙音寶鑑和普通話閩南語詞典做比較 24文讀音的特色 24文讀音的缺點 25文讀音練習： 增註注音千字文 46附錄： 「跠(khu5)」三年較贏你「倒」三工 台灣閩南語的文讀音、白話音的辨別 前言 台灣閩南語 (簡稱台語) 的文讀音和白話音形成是因為中國歷史上中原人數次為著避禍或是南征定居及向外移民，受著後來時代語言以及無仝使用層次交流影響所形成的。嚴格講起來是文讀音和白話音是漢藏語系佇時間流動過程中所產生的兩種語言，因為使用共同的漢族文字，所以才認為文讀音和白話音攏是台語的組成份子。 扮仙 下面請欣賞佇民間傳的一個「自己要用，不賣他人」的小小故事： 有一個散鄉人chua7著in1十一歲的囝做伙出去市內欲買物件。來到一間好額人開的雜貨店。彼間店的頭家抵好出去款貨，干單留伊七歲的囡仔顧店。 因為彼個散鄉人真散赤，看來看去攏無夠錢通好買，伊就四界相來相去，誠無簡單去看著囥佇壁角仔一支舊掃帚，就真想欲買彼支掃帚。伊開嘴就共彼個好額人的囝問看彼支掃帚偌濟錢。 「囡仔兄，咱借問一下，壁角仔彼支掃帚欲賣幾sian2錢？」 彼個囡仔斡頭過去看，看著散鄉人咧講的彼支掃帚就是in1兜平常時佇咧掃土腳的掃帚。就共伊回答講：「自己要用，不賣他人。」 彼個散鄉人聽著人的囡仔的回答了後就斡頭共in1囝講：「你看，人好額人的囡仔就是無仝款，實在真，連講出來的話就攏用讀冊音，咱實在是綴人未著。」 in1彼個候生聽了後就共in1老父應講：「彼塔有啥麼了不起，真簡單的代誌，我嘛會曉。」 in1老父毋相信伊的話就講：「你敢會曉？」 in1囝自信滿滿講：「轉去厝了後，另工若有機會才看我的。」 in1父仔囝轉去厝了後，過無幾工。就有人客來in1兜拜訪，抵好賰彼個散鄉人的囡仔佇咧顧厝。 人客問講：「恁序大人有佇咧否？」 彼個囡仔應講：「無呢。有啥麼代誌sioo0？」 人客就講：「是欲來共恁阿姐講親情的啦。欲共恁阿姐做予隔壁村的人遐，你才共恁老父講一下。」 彼個囡仔想講機會來矣。想講欲借這個機會共展一下，通a2好予in1老父等咧轉來的時陣共呵咾一下。伊就共人客講：「阮阿姐無欲嫁人啦。」 彼個人家感覺真好奇就共問講：「恁阿姐是按怎無欲嫁人矣？」 彼個囡仔想到等一下有通a2予in1老父呵咾就真歡喜將伊學著的彼句話共講出來：「自己要用，不賣他人。」 彼個人客就無佫再講啥麼話就離開彼個散鄉人in1兜。 過一下仔，in1老父對外口轉來。in1囝就真歡喜將人客來拜訪的代誌詳細的對話講予in1老父聽。講完就問in1爸講：「阿爹，你看我有巧否？kang9學的物件就知影通好應用。」 in1老父聽了後真siunn7氣，手就舉起來。in1囝看著in1老父手舉起來，叫是in1爸爸欲共伊搓頭殼好好褒一下，就春風滿面等咧人呵咾。想未到，顛倒是去予in1老父共巴一下真大下。感覺真冤枉，就unna哭unna講：「人ah8無做毋著代誌啊，是按怎共我搧赫大下？」 in1老父愈聽愈siunn7氣，就一面共扑，一面講：「著死囡仔災，未博假博，恁阿姐是人，a毋是物件，講啥麼自己要用，不賣他人。」 現象 頂面的故事雖然是一個笑話，但是背後透漏著一個現象：就是一般人的語言攏會向受過教育的人所使用的語詞採用佇生活語言中，更加將受過教育的人所用的語言當做一種標準。因為佇一般社會佇歷史上，有機會受教育的人攏是好額人，無就是貴族，佇社會上大部分攏是上流社會地位的人，生活品質和水準較岏，所以中下階層的人為著欲提昇家己的社會地位，佇無形中，上階層的人in1的語言就會變成標準語以及予人學習的語言。世界上每一個語言發展攏有這款的現象產生。 文讀音和白話音形成的背景 佇中國五千年的歷史上，朝代不斷更替，歷史重地中心中原地區成為朝代變換時的戰地，有部份人為著欲逃避戰爭為害就會規個家族搬離開故鄉，向外逃難。另外有部份人是因為政治上的種種因素，迫不得已隱名埋姓，走去外地避禍。猶有的就是帶軍向外征戰，部份人就留落來繼續保衛國土，或者是佔地為王。無論如何，向南來到閩南地區的人，家族來到閩南落地生根，當然會將in1的語言帶來閩南地區。 因為中華民族佇儒家思想之下，家族倫理非常重視，若有機會往往攏會想欲轉去故鄉，就是人百歲年老嘛希望有一工囝孫會當將in1的金斗甕仔徙轉去故鄉埋葬。佇保守的觀念之下，語言本身的變化顛倒比原來故鄉的語言演變較慢。另外，加上閩南地區背山面海，交通無偌方便，自然形成一個語言封閉區域，經過幾千年來就漸漸形成風格獨殊的語言。 佇歷史上，秦漢時代開始就有中原人進入閩南地區；到三國東吳時陣算是第一批的人定居閩南；佇西晉末年的時陣，發生了永嘉之禍，算是第一次大規模的中原人士遷入閩南地區，三山志有記載：「永嘉之亂，衣冠南渡，如閩者八族」；東晉時代佫有五胡亂華，遷入的中原人嘛未少；到七世紀唐朝陳政、陳元光父仔囝征蠻人畬族，隨後的部隊帶了未少的家屬佇閩南住落來；佇九、十世紀的時，王湖、王審知兩兄弟來閩南征戰八年，佔地為王統治了五十年。 因此，佇歷史上無仝朝代的人佇數次分批進入閩南的結果，將in1的語言嘛帶進閩南地區，和當地的語言進行交流透濫了後就因此形成閩南語的複雜性。加上隋朝以來的科舉考試，文人所受教育的讀冊音形成了文讀音。佇按呢的背景之下，日常生活所用的語言形成了白話音，和文讀音做伙並行發展才形成閩南語有白話音和文讀音兩種的語音存在佇咧。 透濫 因為語言佇無仝社會階層的人所使用的話語，受著無仝的教育文化的影響，所使用的語音和語詞，甚至語法，就會有無仝款的所在，所以佇無仝階層的人佇交流之間，無形之中，語音、語詞和語法就會互相影響，互相影響經過幾百年了後就形成語言的演變。除了本身社會層次會互相影響以外，外來的文化和語言的交流之下嘛是會形成一款透濫成份佇咧。上明顯的就是台灣地區曾經受過荷蘭和日本的統治，所以語言加減有外來語的成份，加上華語成為政治上規定的標準語，致使著台語和華語嘛是有互相影響的現象。 白話音和文讀音嘛是會佇交流之下形成透濫的情形，所以會形成白話音文讀化，文讀音口語化的現象出現，尤其是經過五十年日本統治和五十年的中華民國政府統治之下的台灣，經過百年的教育斷層，會形成部份的白話音以及文讀音的消失。 分辨白話音和文讀音 白話音 白話音就是日常生活所講的音，有人講是土話或是在地話，嘛號做口語音。所以普通生活交際對話是以白話音為主，包括俚語、諺語、農語、七字仔、竹枝詞、歌謠、民謠、民歌、流行歌、情歌、相褒歌、童謠、跮跎歌、教化歌、孽畜仔話、謎猜、民間禮俗用語、早期地名、笑話、故事、地方傳說等等，另外基督教長老教會的聖經和聖詩嘛是口語音；解嚴了後台語文運動組織以及人士所發行的刊物、散文、小說等等嘛是。 文讀音 文讀音就是文人讀冊所用的語音，嘛叫讀音、讀冊音以及文言音。所以以文言文為主的語詞、文章攏愛用文讀音來讀，包括四書五經、三字經、啟蒙教材、唐詩、千字文、弟子規、昔時賢文，白話文運動以前所有的文章；另外專有名詞、成語、格言、歌仔戲唱詞、布袋戲的人物出台詞、晚期地名、詩文形式的謎猜、情歌、教化歌等等。 白話音舉例 俚語和諺語 1. 三工早重一工；三冬早重一冬。 2. 三日無餾，跁上樹。 3. 弄狗相咬。 4. 食飯食阿奓，趁錢積私khia1。 5. 食對葯，青草一葉；食無著葯，人參一石。 農諺 1. 九月颱，無人知。 2. 九月風吹滿天哮。 3. 十月液(sioh8)，乞食睏破蓆。 4. 六月一，一雷壓九颱。 5. 初一落雨，初二散；初三落雨到月半。 歌謠 1. 娘仔送哥到大路， 千勸萬勸著忠厚， 毋通貪戀人嫷某， 身命扑歹啥照顧。 2. 池中無水天做旱， 天頂落霜地下寒， 咱哥無娘通作伴， 較慘六月無水泉。 民謠 1. 一隻鳥仔 一隻鳥仔哮救救， 哮到三更一半暝，找無岫， 啥麼人仔共阮撞破這個岫， 予阮掠著毋放伊干休。 2. 天烏烏 3. 丟丟咚啊 4. 搖嬰仔歌 5. 補破網 民歌 1. 竹仔枝 竹仔枝，梅仔籽， 做人新婦識道理， 晏晏睏，早早起， 起來梳頭、抹粉、點胭脂。 入大廳，拭桌椅； 入灶腳，洗碗著； 入繡房，做針黹； 呵咾兄，呵咾弟； 呵咾翁婿好八字， 呵咾親家好家世， 呵咾親姆教示。 2. 刺仔花 刺仔花開kah4白泡泡， 年又到，節也到， 紅紗線，無半縞， 茶仔油，無半甌， 草花頭，無半蕊， 想著心肝較冷水。 3. 番麥開花佇半腰， 飼著戇囝去hong9招， 招得好，人人呵咾， 招得歹，丈人丈姆攏無愛， 真正是戇囝婿。 趁著錢銀丈姆的， 心苦病痛做狗爬， 艱苦叫母及叫父。 4. 做草蓆註 一支二支罔來拈註 ，毋通ka阿母呻註 無錢。 一支二支罔來扭註 ，毋通ka阿母伸長手。 一踅註 做了又一踅，做kah tang時註 才會快活註 。 一踅二踅罔來做，毋通荒荒註 想彳亍註 。 人做ｅ草笠仔金噹噹，阮做ｅ草笠仔破三孔。 人做ｅ草蓆仔一級棒註 ， 阮做ｅ草蓆仔蓋屎礐仔桶。 押-inn韻 押-iu韻 押-uah韻 押-o韻 押-ang韻 押-ang韻 情歌 1. 梅仔好食酸吻吻，楊桃好食加冷損， 若無與哥仝床睏，因何褲帶短三寸註 。 2. 會得及娘妳做堆，未得及娘共相隨， 巧神娘仔生偌嫷，緣份未著真食虧。註 3. 一暝未睏半撐倒，神魂一半去尋哥， 有人講我與你好，心肝現有嘴爭無。 流行歌 1. 月夜愁 2. 白牡丹 3. 雨夜花 4. 望春風 5. 青春嶺 相褒歌 男： 三月時節就未寒，事業做閒上茶山， 徛停舉頭一下看，看著挽茶查某官。 女： 阮娘舉頭共看覓，聽伊念歌才會知， 一身格到這好派，對咱茶山直直來。 童謠 1. 人插花 人插花，伊插草， 人抱嬰，伊抱狗， 人未嫁，伊先走， 人坐轎，伊坐糞斗， 人睏眠床，伊睏屎礐仔口。 2. 火金姑 火金姑，來食茶， 茶燒燒，配芎蕉， 芎蕉冷冷，配龍眼， 龍眼蛆核，來食那仔佛， 那仔佛無子，khang3你的臭頭疕。 3. 白鴒鷥 白鴒鷥，捙糞箕， 捙到溝仔墘，跋一倒， 抾一錢，買大餅送恁姨， 恁姨嫌無賴，喊雞喊狗來咒咀， 咒咀有，扑新婦， 咒咀無，扑嬸婆。 4. 暗晡蠐 暗晡蠐，哮咧咧， 哮啥事(tai7)，哮欲嫁， 嫁佗位，嫁柴梳。 柴梳愛梳頭，嫁老猴， 老猴愛跁樹，嫁和尚， 和尚愛誦經，嫁槍兵， 槍兵愛出戰，嫁菜燕， 菜燕真好食，嫁乞食。 5. 愛哭神 愛哭神，愛哭神， 食飽配土豆仁。 跮跎歌 1. 一放雞 一放雞，二放鴨，三分開，四相疊，五搭胸， 六扑手，七圍牆，八摸鼻，九抱耳，十食起。 2. 一的炒米芳 一的炒米芳， 二的炒韭菜， 三的沖沖滾， 四的炒米粉， 五的五將軍， 六的乞食孫， 七的分一半， 八的跁梁山， 九的九嬸婆， 十的撞大鑼。 扑你千，扑你萬，扑你一千佫一萬， 扑丟丟，你予我捻，捻孔縫，你予我扑十個。 教化歌 1. 咱來出世無半項，轉去雙手又空空， 住這世間若眠夢，死了江山讓別人。 2. 做人毋通扳變，住這世間無幾年， 人若欲死目一nih4，萬事免用人相爭。 3. 世間親像大戲台，苦齣笑詼攏公開， 一生一人演一擺，本事攏愛提出來。 4. 用錢節省是實在，毋通未算代先開， 借錢利息真利害，財產會了對佗來。 孽畜仔話 1. 二十兩─近視。 2. 十二月天睏厝頂─凍霜。 3. 三禮拜，六點鐘─食醋。(二十一工+下晡六點酉時) 4. 蠓仔叮牛角─無采工。 5. 黑矸仔貯豆油─無底看。 謎猜 1. 竹做城，紙包關，大風來，就反亂。 2. 四角兩面，拗起來七面。 3. 一欉一斤，三四欉稱起來無二兩。 4. 紅坩蓋烏蓋，借你摸，借你看，毋通共我摃予破。 5. 尖嘴鳥，歇烏溪，食水少，言語濟。 答：1. 鼓仔燈；2. 面巾；3. 豆菜；4. 雞母珠； 5. 毛筆。 來講文讀音 漢字特色 自從秦朝(221~201B.C.)統一天下了後，因為每一國的語言文字攏無仝款，為了欲予文字有一個規範，所以命令丞相李斯等一寡人，根據大篆字體，做筆畫的簡省以後，向全國頒行，使得成為官定的標準字體，後來程邈做隸書。兩漢時期通行，三國時代鍾繇創造楷書。所以會當講咱今仔日所看著的文字是秦朝固定落來的字形，只是改變字體而已。因為秦朝歷史才十五年而已，所以咱的口語講讀文字是講讀漢文，寫字講寫漢字。 自從字形固定落來了後，漢字就形成一個特色，就是文字成為表意文字。因為每一個所在和時代的語音攏無仝款，所以仝一字漢字佇無款的所在和時代的發音，就會因為語音的無款產生了一個字有無仝的發音，就以表示數字「二」的文字來講就會有「nng7、no7、ji7、li7、gi7、ㄦˋ……」；表示「糖」的音就有「thng5、thonn5、thong5、tong5、ㄊㄤˊ……」。會當講一個漢字就會當包含著古早和現代每一個時代和所在的語音，讀法就會無仝款。 文讀音的來源 台語的語言層次非常的複雜，除了文讀音和白話音以外，所有曾經和台語語言接觸著的文化攏有留著伊的痕跡落來，包括著外來語(西班牙語、荷蘭語、日語)、官話(早期和現代)、百越遺音、原住民語。一般攏認為文讀音是唐代陳元光(就是開漳聖王) 及唐末王潮、王審知兄弟所帶來的河南讀書音。當然，為著教育在地的子弟來讀冊，就有需要在地的語言所編成的韻書。二百年來閩南語系統的字典、辭典、語典就有百外本以上。 傳統韻書 泉州地區是在閩南地區發達上早的所在，佇宋、元朝時期，曾和埃及亞力山大並峙，是全國對外的的貿易中心，號稱國際航運大港，當然在地的文教嘛真興旺。閩南語韻書代先佇泉州出現就理所當然的事誌。咱閩南語前後出現主要的傳統韻書如下：泉州有黃謙所編的《彙音妙悟》佇1800年出現；漳州有謝秀嵐所編的《彙集雅俗通十五音》(簡稱十五音) 佇1818年出現；台灣梅山有沈富進所編的《彙音寶鑑》佇1954年出現；斗六黃有實編的《台灣十五音辭典》佇1972年出現。 附提羅馬拼音 另外，鴉片戰爭了後，1842年 (清道光二十二年) 和英國佇南京條約簽訂五口通商了後，廈門轉為國際港口，漳泉勢力就佇遐捙拚，因此形成了不漳不泉、是漳是泉的廈門話，因為廈門話的包容性大，煞佇語言的地位取得優勢的地位，加上廈門商業經濟的影響及文教興旺的緣故，廈門話成為閩南語的的語言中心，也就是講成為標準語。有英國長老會牧師杜嘉德牧師所編的《廈英大辭典》佇1873年出現；台南教會公報社佇1913年出版台南宣教師甘為霖所編的《廈門音新字典》；大陸廈門大學佇1984年出版黃典誠等廈大教授所編的《普通話閩南方言詞典》。 換講假名拼音 1894年(清光緒二十年)，甲午戰爭爆發，清朝戰敗，1895年簽馬關條約將台灣割讓予日本，日本領台了後，總督府學務部就著手研究台語。日本學者以嚴謹的態度，長期對台灣閩南語進行調查做研究，留落來非常豐富的文獻，in所編寫的字典、語典質量真岏，超出任何時代的任何機構。其中1907年總督府民政部總務局學務課發行小川尚義主編的《日台大辭典》；1931和1932佫再發行小川尚義主修的《台日大辭典》，全部是1916頁，收詞九萬外條，攏是口語詞，文言詞是少數，是有史以來最完備的閩南語口語詞典，以廈門音為標準，兼收漳泉各地方言，是閩南語方言資料最豐富的辭典。 語音特色 語音會受到語言交流了後起變化，起先是一個詞開始，了後影響某一個韻，會有分化或是簡化的情形，過了一段時間了後，就影響了規個音韻系統的重新調整，所以無仝時期所出的字典的韻數就會改變，像《彙音妙悟》有五十韻(實的是四十八韻)；《十五音》有五十韻；《彙音寶鑑》四十五韻；《台灣十五音辭典》四十六韻。 文讀音和韻書的關係 傳統韻書收錄文讀音和白話音，但是白話音攏是附帶收入去的，一般攏無完整，因此基本上會使講韻書的最大目的是為著欲讀文讀音所準備的，日常生活用會著的白話音佇實際上應用會著才收錄會著。無仝腔口的文讀音自然就會無仝款的讀冊音。親像「去」字，老派泉音就讀做khi，新派就讀做khu，漳音就讀做khi，廈門音以khu為主。所以文讀書有字典做規範，佇變化速度就會比白話音卡慢，基本上嘛是會隨著時代無仝來轉換，但基本上攏是維持著在地的語音的聲韻系統。 三十字祖 文讀書和白話音的韻書出現以後就會有一寡生理人為著做生理，就會有文讀音的俗貨仔字典出來。其中有一本漳州系統叫做《增補彙音》佇1820年出現，伊的韻只有三十韻而已，叫做三十字祖就是「君、堅、金、歸、家、干、光、乖、京、官、姑、嬌、稽ke、宮、高、皆、根、姜、甘、瓜、江、蒹、交、伽、、葩pa、龜、箴kom、璣、走勼kiu1」(有網底的文字代表和彙音寶鑑用字無仝的字)。即然是俗仔貨，當然就將一寡少數字的鼻元音的文讀音排除在外。 和普通話閩南語詞典做比較 文讀音和白話音的音韻系統是無完全仝款，下面就將《普通話閩南語詞典》的文讀音系統分析了後的資料。 1. 文讀音無-h結尾。 2. 除了m-、n-、ng-以及極少數例外(有八字：怕、惡、耗、好、火、伙、夥、貨；加上其他可有可無的12字)以外，文讀音無鼻元音。 3. -iang韻攏是白話音；-io只有「茄kio5、靴hio1」，根據其出現字數以及其他字典明顯有錯誤。 4. 鼻聲母的韻只賰-a、-ai、-au、ne(泥ne5; ne7)、-i(m-; n-)、mia(咩、乜)、niau2、niu2(扭)、-o、mui(mui2、mui5、mui7)十韻。總字數163字。所有文讀音字數9069字。 5. 其他的韻有-a,-ai,-am,-an,-ang,-au,-e,-i,-ia, -iam, -ian,-iau,-im,-in,-ing,-iong,-iu,-o,-ong,-oo,-u,-ua,-uai, -uan, -ue,-ui,-un攏總二十七韻。 經過詳細比對了後咱就會發現著，除了明顯無收著的鼻元音的韻以外，三十字祖確實無毋著，咱發現著《普通話閩南語詞典》顛倒減三韻，三十字祖有分「家、稽」兩韻，《普通話閩南語詞典》只賰-e一個韻，若是佫和十五音比較，咱發現著音韻的簡化過程。另外，三十字祖加出來的是「姜kiang1」韻，是漳州音韻系統堅持著伊的語音形式，當然《彙音寶鑑》嘛是仝款。《普通話閩南語詞典》攏將「-iang」的韻認定是白話音。另外，漳州的一個韻是「箴kom1」，原來的十五音文讀音的總字數只有十二字(《彙音寶鑑》十四字)，三十字祖內的文字(無註明文讀音或是白話音)有一百四十九字。顯示出漳音和泉音佇語言交流捙拚中受著形成了後的廈門音排斥。 及彙音寶鑑比較 《彙音寶鑑》的順序頭前三十字韻的順序和三十字祖只有二個無仝，就是用「梔kinn1」thap4「稽ke1」；用「監kann1」thap4「葩pa1」；將「葩」韻徙去「箴」，整體講起來，《彙音寶鑑》仝款無「稽ke1」韻，是和「家」合韻了後變成一個「嘉ke1」韻。經過統計《彙音寶鑑》加出來的韻攏總有十六韻是三十字祖無的，總共才267字個文讀音。 彙音寶鑑和普通話閩南語詞典做比較 照面頂的資料咱扣掉《普通話閩南語詞典》明顯錯誤的韻以外，《普通話閩南語詞典》攏總是三十七韻。咱詳細查《彙音寶鑑》了後，發現無文讀音的韻「褌kng1」、「茄kio1」、「姆km1」、「驚kiann1」有四韻，按呢意思《彙音寶鑑》文讀音全部有四十一韻，比《普通話閩南語詞典》加四韻出來，除了三十字祖加出來的「姜kiang1」和「箴kom1」以外，就是「光kuang1」(闖chuang3)、「官kuann1」(kuann2 (寡、剮、、)、怎cuann2、nua2(、)等七字)。佫經過詳細比較了後，發現「姜kiang1」和「官kuann1」兩韻佇《普通話閩南語詞典》是白話音系統，「箴」和「光」兩韻完全無出現佇《普通話閩南語詞典》的文讀音和白話音內面，而且這二韻的文讀音佇《彙音寶鑑》的總字數才十五字nia7nia7。當然無法度佇兩個語言交流中生存落來。 文讀音的特色 經過比較了後咱發現著文讀音的特色是：音韻系統比白話音系統簡化。咱確定文讀音簡化系統了後的特點是： 1. 白話音的-h全部消失，換另外一句話，咱會當確定凡是字尾-h的入聲韻全部是白話音。 2. 極少數的鼻元音文讀音應該是受到強勢白話音鼻元音的影響倒頭行的韻。因為遐的字的白話音顛倒無鼻元音，是真特殊的現象。 3. 文讀音的韻較少：咱會當講文讀音的韻是包含佇白話音內面。 文讀音的缺點 因為文讀音將白話音音韻系統簡化自成一個系統，只是規個語言系統的小部份。雖然和白話音共同使用大部份的聲、韻、調，文讀音因為有韻書做完整的文字紀錄，容易保存。因為注重文讀音的紀錄，顛倒使得白話音成為失去注意，使得大部份無文字記錄保存的白話音快速消失。 文讀音練習： 增註注音千字文 Thian1- ti7 guan5- hong5 u2- tiu7 hong5- hong1 天 地 元 黃 宇 宙 洪 荒 蒼天 土地 元首 黃種 屋宇 宇宙 水大 荒野 Jit8- guat8 ing5- cik4 sin5- siu3 liat8- tiong1 日 月 盈 昃 辰 宿 列 張 太陽 月亮 盈虧 日昃 時辰 星宿 排列 開張 Han5 lai5 su2 ong2 chiu1 siu1 tong1 cong5 寒 來 暑 往 秋 收 冬 藏 寒冷 來往 暑熱 往來 秋天 收留 冬天 匿也 Jun7- u5 sing5- sue3 lut8- lu7 tiau5- iong5 閏 餘 成 歲 律 呂 調 陽 閏月 有餘 成功 年歲 律例 陽律 調和 陰陽 un5- ting5 ti3- u2 loo7- kiat4 ui5- song1 雲 騰 致 雨 露 結 為 霜 山氣 飛騰 催致 風雨 露水 締結 因為 霜降 kim1 sing1 le7- sui2 giok8 chut4 khun1- kong1 金 生 麗 水 玉 出 崑 岡 黃金 生發 秀麗 雨水 玉石 出入 崑崙 岡嶺 kiam3 ho7 ku7- khuat8 cu1 ching1 ia7- kong1 劍 號 巨 闕 珠 稱 夜 光 刀劍 字號 巨細 北闕 珠寶 稱呼 黑夜 光明 ko2 cin1 li2- nai7 cai3 tiong7 kai3- kiong1 果 珍 李 柰 菜 重 芥 薑 果然 珍珠 桃李 食物 飯菜 輕重 草芥 蔥薑 hai2 ham5 ho5 tam7 lin5 ciam5 u2 siong5 海 鹹 河 淡 鱗 潛 羽 翔 江海 鹹淡 黃河 鹹淡 鱗介 潛藏 羽毛 翱翔 liong5- su1 honn2- te3 niau2- kuan1 jin5- hong5 龍 師 火 帝 鳥 官 人 皇 蛟龍 師傅 水火 皇帝 鳥獸 官宦 人我 民君 su2- ce3 bun5- ju7 nai2- hok8- i1- siong5 始 制 文 字 乃 服 衣 裳 始終 節制 文武 字畫 乃可 衣服 衣裳 下服 Thue1- ui7 jiong7- kok4 iu2- gu5 to5- tong5 推 位 讓 國 有 虞 陶 唐 推托 爵位 退讓 國家 有無 唐虞 陶冶 荒唐 Tau3- bin5 huat8- cue7 ciu1 huat4 siong1- thong1 弔 民 伐 罪 周 發 商 湯 叩弔 庶民 征伐 罪過 周旋 發動 商量 湯水 co7- tiau5 bun7- too7 sui5- kiong2 pian5- ciong1 坐 朝 問 道 垂 拱 平 章 行坐 朝見 求問 道德 上懸 拱手 公平 章句 ai3- iok8- le5- siu2 sin5- hok8- jiong5- kiong1 愛 育 黎 首 臣 伏 戎 羌 溺愛 生育 黎民 首級 君臣 俯伏 戎狄 氐羌 ha5- ni2 it4- thi2 sut8- pin1 kui1- ong5 遐 邇 壹 體 率 賓 歸 王 遠也 近也 數目 身體 遵道 賓客 回家 Bing5- hong7 cai7- tiok4 pik8- ku1 sit8- tiong5 鳴 鳳 在 竹 白 駒 食 場 鳥語 鳳鳥 存也 青竹 明白 良馬 飯食 圍場 hua3- pi7- cho2- bok8 lai7- kip8- ban7- hong1 化 被 草 木 賴 及 萬 方 教化 被褥 花草 樹木 倚賴 及時 數目 方正 kai3- chu2 sin1- huat4 su3- tai7- ngoo2- siong5 蓋 此 身 髮 四 大 五 常 寶蓋 如此 身體 頭髮 數目 大小 數目 平常 kiong1- ui5 kiok4- iong2 khi2- kam2 hui2- siong1 恭 惟 鞠 養 豈 敢 毀 傷 恭敬 心無 鞠躬 養育 豈非 能敢 毀棄 損也 lu2 boo7- cin1- kiat4 lam5 hau7- cai5- liong5 女 慕 貞 潔 男 效 才 良 男女 慕念 志堅 潔淨 男女 效驗 人才 賢良 ti1- ko3 pit4- kai2 tik4- ling5 bok8- bong7 知 過 必 改 得 能 莫 忘 得知 功過 必定 更改 獲也 可為 不也 忘記 bong2- tam5 pi2- tuan2 bi2- si7 ki2- tiong5 罔 談 彼 短 靡 恃 己 長 無也 談論 彼此 短小 莫也 依恃 自己 長短 Sin3- su3 kho2- hok8 khi3- iok8 lan5- liong5 信 使 可 覆 器 欲 難 量 信札 差遣 可否 反覆 器具 欲念 艱難 盡量 Bik8 pi1 si1- jiam2 si1 can3 ko1- iong5 墨 悲 絲 染 詩 讚 羔 羊 翰墨 悲傷 絲竹 感染 詩詞 稱讚 羔皮 牛羊 King2- hing7 ui5- hian5 khik4- liam7 cok4- sing3 景 行 維 賢 克 念 作 聖 光景 行走 恭維 賢良 勝也 惡念 為也 聖人 Tik4 kian3 bing5 lip8 hing5 tuan1 piau2 cing3 德 建 名 立 形 端 表 正 功德 立也 姓名 坐立 形貌 端正 表面 方正 Khong1- kok4 thuan5- sing1 hu1- tong5 sip8- thing3 空 谷 傳 聲 虛 堂 習 聽 空虛 山谷 傳後 聲音 虛空 廳堂 習練 耳聞 Ho7 in1 ok4 cik4 hok4 uan5 sian7 khing3 禍 因 惡 積 福 緣 善 慶 禍殃 因為 善惡 積畜 福氣 緣分 善良 吉慶 chiok4- phik4 hui1- po2 chun3- im1 su7- king7 尺 璧 非 寶 寸 陰 是 競 尺寸 璧玉 是非 珍寶 尺寸 光陰 是非 爭競 cu1- hu7 su7- kun1 uat8- giam5 u2- king3 資 父 事 君 曰 嚴 與 敬 資質 父母 服事 人君 語詞 威嚴 給與 恭敬 hau3 tong1- kiat8- lik8 tiong1 cik4- cin7- bing7 孝 當 竭 力 忠 則 盡 命 孝敬 應當 竭力 勇力 忠直 規則 完也 天命 lim5- sim1 lu2- pok8 siok4- hing1 un1- ching3 臨 深 履 薄 夙 興 溫 凊 登臨 深淺 步履 淺薄 夙緣 興起 溫柔 凊涼 su7- lan5 su1- hing1 ju5- siong5 ci1- sing7 似 蘭 斯 馨 如 松 之 盛 相似 花名 此也 香氣 像也 松柏 助語 茂盛 chuan- liu5 but4- sik4 uan1- ting5 chu2- ing3 川 流 不 息 淵 澄 取 映 山川 流動 無也 休息 淵源 清也 得也 明也 Iong5- ci2 jiok8- su1 gian5- su5 an1- ting7 容 止 若 思 言 辭 安 定 容貌 停止 倘若 思想 言語 辭訟 安逸 必定 Tok4- choo1 sing5- bi2 sin7- ciong1 gi5- ling7 篤 初 誠 美 慎 終 宜 令 篤實 起初 誠實 好也 謹慎 終始 便宜 法令 Ing5- giap8 soo2- ki1 cik8- sim7 bu5- king3 榮 業 所 基 籍 甚 無 竟 榮耀 事業 所以 地基 典籍 過也 有無 究竟 Hak8 iu1 ting1- su7 liap8- cik4 ciong5- cing3 學 優 登 仕 攝 職 從 政 習學 優劣 登臨 仕宦 攝位 職分 侍從 政事 Cun5- i2- kam1- tong5 khu3 ji0 ik8- ing7 存 以 甘 棠 去 而 益 詠 存亡 可以 甜味 海棠 除去 語辭 有益 吟詠 Gak8 su5- kui3- cian7 le2 piat8- cun1- pi1 樂 殊 貴 賤 禮 別 尊 卑 樂器 殊非 富貴 貧賤 禮節 分別 尊敬 卑下 siong7 ho5 ha7 bok8 hu1 chiong3 hu7 sui5 上 和 下 睦 夫 唱 婦 隨 上下 和氣 卑下 和睦 丈夫 歌唱 妻也 侍從 gue7- siu7 hu7- hun3 jip8- hong7 bio2- gi5 外 受 傅 訓 入 奉 母 儀 內外 領也 師傅 教育 進也 奉承 父母 威儀 cu1- koo1 pik4- siok4 iu5- cu2 pi2- ji5 諸 姑 伯 叔 猶 子 比 兒 凡也 翁姑 伯仲 叔季 猶是 父子 較也 小兒 khong2- huai5 hing1- te7 tong5- khi3 lian5- ki1 孔 懷 兄 弟 同 氣 連 枝 大也 懷念 年長 年幼 相同 氣血 不絕 樹節 kau1- iu2 tau5- hun1 chiat4- boo5 cim1- kui1 交 友 投 分 切 磨 箴 規 相交 朋友 投遞 分派 切實 琢磨 箴銘 規矩 jin5- cu5 un2- chik4 co7- chu3 hut8- li5 仁 慈 隱 惻 造 次 弗 離 仁心 慈愛 不見 惻怛 赴也 亞也 弗許 分別 Ciat4- gi7 liam5- thui3 tian1- phai3 hui2- khui1 節 義 廉 退 顛 沛 匪 虧 貞節 忠義 不貪 進退 倒也 大也 匪類 缺也 sing3 cing7 cing5 ik8 sim1 tong7 sin5 phi5 性 靜 情 逸 心 動 神 疲 本性 安靜 七情 安逸 人心 靜動 神明 倦也 Siu2- cin1 ci3 buan2 tiok8- but8 i3 gi5 守 真 志 滿 逐 物 意 移 把守 真偽 立志 盈也 追逐 物件 心意 動也 Kian1- chi5 nga2- cho1 honn3- ciok4 cu7- bi5 堅 持 雅 操 好 爵 自 縻 堅固 手持 風雅 節操 好歹 爵祿 自己 虛縻 Too1- ip8 hua5- ha7 tong1- se1 ji7- king1 都 邑 華 夏 東 西 二 京 都城 縣邑 華美 中夏 東方 西方 數目 京城 Pue7- bong5 bian7- lok8 hu5- ui7 ku7- king1 背 邙 面 洛 浮 渭 據 涇 反背 北邙 面目 水名 浮沉 水名 把持 涇原 kiong1- tian7 puan5- ut4 lio5- kuan3 hui1- king1 宮 殿 盤 鬱 樓 觀 飛 驚 宮室 殿建 盤旋 幽也 樓台 看也 飛翔 駭也 too5- sia2 khim5- siu3 hua7- chai2 sian1- ling5 圖 寫 禽 獸 畫 綵 仙 靈 圖畫 寫字 飛禽 走獸 繪也 綵色 仙佛 驗也 bing2- sia3 pong7- khe2 kiap4 tiong3 tui3- ing5 丙 舍 傍 啟 甲 帳 對 楹 干名 客舍 依傍 開也 干名 帳幕 成雙 柱也 su3- ian5 siat4- sik8 koo2- sik4 chui1- sing1 肆 筵 設 席 鼓 瑟 吹 笙 放也 酒筵 設止 位也 鐘鼓 琴瑟 吹唱 笙管 sing1- kai1 lap8- pe3 pian7- cuan2 gi5- sing1 陞 階 納 陛 弁 轉 疑 星 高陞 階級 收納 殿陛 將弁 旋也 惑也 星辰 iu7- thong1- kong2- lue7 coo2- tat8- sing5- bing5 右 通 廣 內 左 達 承 明 上首 通達 廣大 內外 下首 通也 奉承 明亮 ki3- cip8- hun5- tian2 ik8- cu7- kun5- ing1 既 集 墳 典 亦 聚 群 英 既往 聚集 墳邱 古典 語助 聚會 合群 英雄 Too7- ko2 ciong1- le7 chik4- su1 pik4- king1 杜 稿 鍾 隸 漆 書 壁 經 塞也 艸稿 愛也 隸書 膠漆 書籍 牆壁 經緯 hu2- loo5 ciong3- siong3 loo7- hiap4 huai5- khing1 府 羅 將 相 路 俠 槐 卿 府第 羅列 將軍 宰相 道路 游俠 木名 公卿 Hoo7 hong1 pat4- kuan7 ka1 kip4 chian1- ping1 戶 封 八 縣 家 給 千 兵 戶口 封典 數名 州縣 家室 給發 數名 兵卒 ko1- kuan1 pue5- gian2 khu1- kok4 cin3- ing1 高 冠 陪 輦 驅 轂 振 纓 上也 衣冠 陪伴 輅輦 逐也 輪轂 振興 帽纓 se3- lok8 chu2- hu3 ku1- ka3 hui5- khing1 世 祿 侈 富 車 駕 肥 輕 世界 福祿 奢侈 富貴 舟車 尊稱 肥瘦 輕重 chik4- kong1 boo7- sit8 lik8- pi1 khik4- bing5 策 功 茂 實 勒 碑 刻 銘 計策 功勞 盛也 虛也 勒逼 碑帖 彫刻 感也 phuan5- khe1 i1- un2 coo2- si5 o1- hing5 磻 溪 伊 尹 佐 時 阿 衡 地名 山溪 彼也 道尹 相助 時辰 曲也 權衡 iam3- tik8 khiok4- hu7 bi5- tan3 siok8- ing5 奄 宅 曲 阜 微 旦 孰 營 大也 住宅 委曲 土山 微細 旦夕 誰也 經營 huan5- kong1 khong1- hap8 ce3- jiok8 hu5- khing1 桓 公 匡 合 濟 弱 扶 傾 盤桓 公益 匡扶 會合 救也 無力 扶持 倒也 khi2- hue5 han3- hui7 sue3- kam2 bu2- ting1 綺 迴 漢 惠 說 感 武 丁 輕羅 避也 國名 恩惠 言說 動人 文武 干名 cun3- gi7 bit8- but8 to1- su7 sit8- ling5 俊 乂 密 勿 多 士 寔 甯 英俊 才也 私也 莫也 眾也 四民 不虛 安也 Cin3 choo2 king1- pa3 tio7- gui7 khun3- hing5 晉 楚 更 霸 趙 魏 困 橫 國名 清楚 換也 強也 姓也 國名 圍困 縱橫 ka2- too5 biat8- khik4 cian7- thoo2 hue7- bing5 假 途 滅 虢 踐 土 會 盟 借也 道途 息也 國名 足履 泥土 會合 誓盟 ho5- cun1 iok4- huat4 han5- pe3 huan5- hing5 何 遵 約 法 韓 弊 煩 刑 誰也 從也 預訂 則也 國名 舞弊 相煩 刑法 Khi2- cian2 phoo2- bok8 iong7- kun1 cue3- cing1 起 翦 頗 牧 用 軍 最 精 興也 裁也 偏也 畜牧 支也 三軍 極也 精細 Suan1- ui1 sa1- bok8 ti5- u7 tan1- ching1 宣 威 沙 漠 馳 譽 丹 青 宣佈 威嚴 泥沙 沙地 奔也 名譽 赤色 顏色 Kiu2- ciu1 u2- cik4 pik4- kun7 cin5- ping7 九 州 禹 跡 百 郡 秦 并 數目 州縣 蟲也 古跡 數名 郡邑 國名 并吞 gak8 cong1 thai3- tai7 sian5 cu2 un5- ting5 嶽 宗 泰 岱 禪 主 云 亭 五嶽 祖宗 康泰 山名 參禪 賓主 語詞 亭台 gan7- bun5 cu2- sik4 ke1- tian5 chik4- sing5 雁 門 紫 塞 雞 田 赤 城 鴻鳥 門戶 絳色 不通 家禽 田地 紅也 城廓 khun1- ti5 kiat8- sik8 ku7- ia2 tong7- ting5 昆 池 碣 石 鉅 野 洞 庭 昆仲 沼池 石貌 山石 大也 荒野 山洞 門庭 khong3- uan2 bian5- biau2 giam5- siu7 biau2- bing5 曠 遠 綿 邈 巖 岫 杳 冥 空曠 近遠 絮也 遠也 山名 山峰 杳渺 幽冥 ti7- bun2 u1- long5 bu7- cu1 ka3- sik4 治 本 於 農 務 茲 稼 穡 治亂 根本 語助 農人 事務 此也 禾名 墻夫 siok8- cai7 lam5- bio2 ngoo2- ge7 siok8- cik8 俶 載 南 畝 我 藝 黍 稷 始也 運也 方向 田名 自稱 才能 禾也 高梁 Sue3- siok8 kong3- sin1 khuan3- siong2 thut4- thik8 稅 熟 貢 新 勸 賞 黜 陟 國稅 生熟 進貢 新舊 勸戒 賞罰 貶也 上升 Bing7- kho1 tun1- soo3 su2- gu5 ping2- tik8 孟 軻 敦 素 史 魚 秉 直 姓也 軸也 敦厚 白也 記者 鱗虫 執也 正也 su3- ki1 tiong1- iong5 loo5- khiam1 kin2- thik4 庶 幾 中 庸 勞 謙 謹 飭 眾也 幾何 不偏 平常 勞碌 謙恭 慎也 誡也 Ling5- im1 chat4- li2 kam3- bau7 pian7- sik4 聆 音 察 理 鑑 貌 辨 色 聽也 聲也 考察 公理 鏡也 容貌 駁也 顏色 i5- khuat4 ka1- iu5 bian2- ki5 ki5- tik8 貽 厥 嘉 猷 勉 其 祇 植 貽傳 厥然 嘉禾 謀也 勉力 指名 地神 植物 Sing2- kiong1 ki1- kai3 thiong2- cing1 khong3- kik8 省 躬 譏 誡 寵 增 抗 極 省察 人身 諷也 敕也 榮也 加也 抗抵 盡也 tai7- jiok8 kun7- thi2 lim5- ko1 hing7- cik4 殆 辱 近 恥 林 皋 幸 即 危也 羞也 不遠 愧也 山林 上也 僥幸 即刻 liong2 soo1 kian3- ki1 kai2- coo1 sui5 pik4 兩 疏 見 機 解 組 誰 逼 分兩 分之 看見 機器 判也 絲也 不知 迫也 sik4- ku1 han5- chu3 tim5- bik8 cik4- liau5 索 居 閒 處 沉 默 寂 寥 繩也 住所 豫也 居處 不浮 默然 寂寞 寥落 kiu5- koo2 sim5- lun7 san3- lu7 siau1- iau5 求 古 尋 論 散 慮 逍 遙 求學 古今 覓也 言論 放也 思也 遠也 遠也 him1- coo3 lui7- khian2 chik4- sia7 huan1- ciau1 欣 奏 累 遣 慼 謝 歡 招 喜也 奏事 係也 差也 憂也 酬謝 喜也 招呼 ku5- ho5 tik8- lik8 uan5- bong2 thiu1- tiau5 渠 荷 的 歷 園 莽 抽 條 水塘 花名 目的 歷代 花園 粗莽 拔也 例也 pi5- pa5 buan2- chui3 ngoo5- tong5 co2- tiau1 枇 杷 晚 翠 梧 桐 早 凋 果名 果名 夜晚 翡翠 木名 木名 清早 落也 Tin5 kun1 ui2- e3 lok8- iap8 phiau1- iau5 陳 根 委 翳 落 葉 飄 颻 設也 根本 託也 遮掩 流落 枝葉 回風 回風 iu5- khun1 tok8- un7 ling5- boo5 kang3- siau1 遊 鶤 獨 運 凌 摩 絳 霄 游玩 大鳥 孤也 運動 凌虐 研也 紫色 九霄 Tam1- thok8 uan2- su7 gu7- bok8 long5- siong1 耽 讀 翫 市 寓 目 囊 箱 樂也 誦也 習倦 市鎮 寄居 眼睛 袋也 箱子 ik8- iu5 iu1- ui3 siok8- ni2 huan5- chiong5 易 輶 攸 畏 屬 耳 垣 牆 容易 車也 安行 怕也 下屬 耳目 短墻 壁也 ku7- sian7 chan1- huan7 sik4- khio2 chiong1- chiong5 具 膳 餐 飯 適 口 充 腸 具文 具食 素餐 米也 適意 口舌 充足 肚腸 poo2- u3 phing1- cai2 ki1- iam3 co1- khong1 飽 飫 烹 宰 饑 厭 糟 糠 飢飽 多食 煮也 宰相 餓也 倦也 酒渣 粞也 chin1- chik4 koo3- kiu7 lo2- siau3 i7- liong5 親 戚 故 舊 老 少 異 糧 親眷 戚誼 故交 新舊 衰也 少壯 奇也 餉也 chiap4- gu7 cik4- hong2 si7- kun1 ui5- pong5 妾 御 績 紡 侍 巾 帷 房 小妻 執轡 紡也 紡絲 侍奉 手巾 幔也 房屋 uan5- sian3 uan5- kiat gun5- ciok4 ui2- hong5 紈 扇 圓 潔 銀 燭 煒 煌 素紗 扇子 銀圓 淨也 金銀 火燭 光明 明也 tiu3 bian5 sik8 bi7 lam5- sun2 siong7- chong5 晝 眠 夕 寐 藍 筍 象 床 日中 睡也 日落 寤寐 色也 竹芽 大獸 臥榻 hian5- ko1 ciu2- ian3 ciap4- pue1 ku2- siong1 絃 歌 酒 讌 接 杯 舉 觴 弓絃 唱也 米酒 會也 受也 酒器 選拔 酒器 Kiau2- siu2 tun3- ciok4 uat8- u7 chia2- khong1 矯 手 頓 足 悅 豫 且 康 強貌 手足 叩地 腳也 喜也 先籌 苟且 健也 Tik4- hio7 su7- siok8 ce3- su7 cing1- siong5 嫡 後 嗣 續 祭 祀 蒸 嘗 嫡親 前後 繼也 接續 祀祖 祀祖 蒸籠 辨味 Khe2- song2 cai3- pai3 siong2- ku7 khiong2- hong5 稽 顙 再 拜 悚 懼 恐 惶 稽查 額也 重也 俯首 恐也 怕也 怯也 驚也 Cian1- tiap8 kan2- iau3 koo3- tap4 sim2- siong5 牋 牒 簡 要 顧 答 審 詳 紙也 文書 竹簡 取討 回首 問答 審問 詳考 Hai5- koo2 siong2- iok8 cip4- jiat8 guan7- liong5 骸 垢 想 浴 執 熱 願 涼 脛骨 污也 思也 沐浴 持也 冷熱 心願 微寒 lu5- lo5 tok8- tik8 hai7- iok8 chiau1- siong1 驢 騾 犢 特 駭 躍 超 驤 似馬 小驢 小牛 特別 驚駭 跳也 超然 騰也 tu1- cam2 cik8- too7 poo7- hik8 phuan7- bong5 誅 斬 賊 盜 捕 獲 叛 亡 殺也 絕也 小竊 強盜 緝也 得也 反叛 逃亡 poo3- sia7 liau5- uan5 khe1- khim5 guan2- siau3 布 射 遼 丸 嵇 琴 阮 嘯 布疋 發矢 遠貌 丸葯 姓也 琴瑟 姓也 吟嘯 thiam5- pit4 lun5- ci2 kun1- khau2 jim7- tiau3 恬 筆 倫 紙 鈞 巧 任 釣 安也 竹筆 常也 竹紙 大也 湊巧 擔任 鉤子 sik4- hun1 li7- siok8 ping7- kai1 ka1- biau7 釋 紛 利 俗 並 皆 佳 妙 放也 紛紜 吉利 風俗 齊行 皆是 妙也 極美 moo5 si1 siok4- cu1 kong1 pin5 gian5- chiau3 毛 施 淑 姿 工 顰 妍 笑 皮毛 佈施 善也 丰采 長工 蹙額 妍媸 嬉笑 lian5- su2 mui2- chui1 hi1- hui1 long2- iau7 年 矢 每 催 曦 暉 朗 曜 歲也 箭也 不一 催促 朝日 日光 高明 星曜 Suan5- ki1 hian5- uat4 hue3- phik4 huan5- ciau3 璿 璣 懸 斡 晦 魄 環 照 美玉 珠類 罣也 旋也 暗也 魂魄 繞也 對照 ci2- sin1 siu1- hoo7 ing2- sui1 kit4- siau7 指 薪 修 祜 永 綏 吉 劭 手指 柴也 修理 福也 久也 安也 吉凶 勉也 ku2- poo7 un2- ling2 hu2- giong2 long5- biau7 矩 步 引 領 俯 仰 廊 廟 規矩 徒行 導也 領袖 低首 望也 廡下 宗廟 Siok4- tai3 king1- cong1 pai5- hue5 siam1- thiau3 束 帶 矜 莊 徘 徊 瞻 眺 束縛 衣帶 憐也 村莊 徘徊 徘徊 仰望 望遠 Koo1- loo7 kua2- bun5 gu5- bong5 ting2- chiau3 孤 陋 寡 聞 愚 蒙 等 誚 獨也 鄙陋 多寡 見聞 笨也 微昧 平等 讓也 ui7- gu2 coo7 cia0 ian1 cai0 hoo5 ia0 謂 語 助 者 焉 哉 乎 也 語助 言語 相助 語詞 語助 妙哉 嘆詞 可也 ※感謝蕭滕村老師(嘉女退休)的修改千字文的標注。 附錄： 「跠(khu5)」三年較贏你「倒」三工 有一個漢學仔先也來到一個庄腳所在教冊，伊的學問無真飽學，所以有一工伊佇咧教冊的時，去抵著一字未曉讀，想講未當佇當場漏氣，看著彼字的字形像「鳥」字，內底是一字「山」字，伊就運用文字六書的觀念看看咧，像講字形像是一隻鳥仔踞(ku1)佇山面頂，伊最後決定將彼字讀做「跠(khu5)」。 三年過了後，彼個漢學仔先也離開彼個庄腳，換一個少年的來教。有一工伊去教著彼字，共in1講彼字愛讀做「倒」，在座每一個學員攏共伊糾正講是「跠khu5」，講是以前的漢學仔先也教的。in1佇遐爭論足久，最後學員叫彼個新漢學仔先也若毋相信去庄裡問，看彼字是毋是讀做khu5。伊來到庄內問每一個人，問著的答案攏是「khu5」，伊猶是毋死心，想講欲問庄內上飽學的老前輩，結果彼個老前輩嘛是仝款共講彼字是「khu5」。伊聽著按呢，最後佇遐自言自語講：「佫真正是唸khu5無毋著！」 邊仔有人聽著就共伊應講：「hio5─，人進前彼個佇遮「跠(khu5)」三年甘會較輸你這個佇遮才「倒」三工nia7nia7，是否？」 [小記] 雖然這是一個笑話，但是伊所顯示出來卻是一個語言變化的開始。另外就是語言往往是十個人內底，九個毋對，一個人對，結果對的人顛倒會成為毋對的人，而且有時顛倒去予人恥笑伊的「毋對」。咱另外會當看教育的力量有偌大，一旦定根以後想欲挽回是真困難的代誌。其實笑話的流傳毋是純粹講講笑笑而已，伊所隱藏的意義才是值得咱去思考的。 夢生(Dyertung)簡介 嘉義縣中埔鄉人，一九六四年生，輔仁大學語言學研究所碩士。一九八四年開始台語研究，多次參加國際性閩南語研討會並有論文發表，有十多篇台語文曾發表在數種台語文雜誌上，一九九九年榮獲台灣省八十八年鄉土語文競賽閩南語教師組音字項第一名，二○○○年曾擔任全省性閩南語競賽之評審亦擔任各地母語教師研習營講師。 電 子 批：dyertung@yahoo.com.tw 書名頁,,48,p1s1,p2s1,47 目錄碼,背面,倒序,46,p1s2,p2s2,45 正面頁碼 44,p1s3,42,3,40,5,38,7,36,9,34,11,32,13,30,15,28,17,26,19,24,21 背面頁碼 22,23,20,25,18,27,16,29,14,31,12,33,10,35,8,37,6,39,4,41,p2s3,43 台灣閩南語師資研習教材 台灣閩南語語音結構及其練習台灣閩南語的文讀音、白話音的辨別 夢生(Dyertung) 2002.07.29 註� 這條囡仔歌是我參加6月30日到7月1日ti新竹師院舉辦ｅ母語教育研討會時，有一位來自苗粟ｅ一位教師ti 30日暗時餘興節目所唸ｅ童謠，我隨將伊記落來，並且將寫無著ｅ話句來請教伊補完全。希望咱逐個會凍提供趣味ｅ童謠hoo咱來共同欣賞，因為童謠除了反應時代背景以外，hoo咱了解先民ｅ生活，伊嘛是一款文學形式。閣卡重要ｅ是，伊無形中保存著咱ｅ母語中ｅ話詞和文法，以及詼(khue1)諧ｅ智慧。親像這首詩，對我本人來講，「呻」(chan1)ｅ口語音和意思除了「餐廳」ｅ「餐」以外，並無其他ｅ仝音字，「親像」ｅ「親」對我來講，伊ｅ音是chin1並m是另外一個音chan1。ti我本人ｅ來講，只有講「吟」(hainn1)而已，因為這首童謠ｅ表達語是用「呻」(chan1)而保存落了，同時hoo我學著另外一種ｅ表達法。所以希望咱會凍共同來拍拼，將咱漸漸失去ｅ母語借著民間流傳ｅ歌謠、故事等等ｅ收集來逗逗救轉來。1997.07.03記。 註� 拈：音ni1。 註� 呻：音chan1，訴苦。 註� 扭：音giu2。 註� 踅：音cua7；有寫做「迣、畷」，回，遍，次，改，罷。 註� tang時：啥麼時陣。 註� 快活：「快」音khuinn3 。 註� 荒荒：音hong1 hong1；一心一意沈迷ti(某一項代志)。 註� 彳亍：音chit4 tho5；玩耍，嬉戲。亦寫作「佚陶；；跮跎。」 註� 一級棒：日語，音it8 ci1 bang2。 註� 暗示已經有身並思念情人。 註� 本首指有緣相識，卻無緣成姻緣。巧神：聰明伶俐之意。